
जनकपुरधाम-
कर्णाली प्रदेशमा आगामी मङ्सिरमा हुने १० औँ राष्ट्रिय खेलकुद प्रतियोगितामा मधेश प्रदेशको प्रतिनिधित्व गर्ने खेलाडी छनोटका लागि प्रदेशस्तरीय खेलकुद प्रतियोगिता शुरु भएको छ ।
मधेश खेलकुद परिषद्को दोस्रो वार्षिकोत्सवको अवसर पारेर जनकपुरधाममा शुक्रबार शुरु भप्रतियोगितामा प्रदेशका आठवटै जिल्लाका खेलाडी सहभागी छन् । ‘खेली मधेश, जिती मधेश’ नारासहित सञ्चालन भइरहेको प्रतियोगितामा उत्कृष्ट प्रदर्शन गर्ने खेलाडीलाई राष्ट्रिय खेलकुद प्रतियोगितामा सहभागी गराइनेछ ।
मधेश खेलकुद परिषद्का सदस्यसचिव शिवजीप्रसाद कानुका अनुसार १०औँ राष्ट्रिय खेलकुदमा ३२ विधाका खेल समावेश गरिएकामा मधेश प्रदेशले २९ विधामा सहभागिता जनाउने तयारी गरेको छ । प्रतियोगितामा भलिबल, फुटबल, टेबलटेनिस, खो–खो, ह्यान्डबल, तेक्वान्दो, बास्केटबल, जुडो, ब्याडमिन्टन, भारोत्तोलन, बुद्धिचाल, उसु, हक्कीलगायतका खेल समावेश छन् ।
प्रदेशमा खेलकुदको विकास, प्रतिभावान खेलाडीको पहिचान तथा दक्ष खेलाडी उत्पादन गर्ने उद्देश्यले प्रतियोगिता आयोजना गरिएको सदस्यसचिव कानुले बताए । खेलकुद क्षेत्रको बजेट कटौतीप्रति चिन्ता व्यक्त गर्दै खेलाडीको क्षमता अभिवृद्धि र आवश्यक खेल पूर्वाधार निर्माणका लागि पर्याप्त बजेट विनियोजन गर्न प्रदेश सरकारसँग आग्रह गरिएको उनले बताए ।



